En il chantun Basilea-Citad è il socialdemocrat Mustafa Atici vegnì elegì en la regenza. El succeda a Beat Jans ch'è ussa en il Cussegl federal. Atici ha survegnì 25'198 vuschs, ses concurrent liberaldemocrat Luca Urgese 22'228 vuschs, uschia ha Atici gudagnà cun 51%. Mustafa Atici è interprendider da gastro ed è stà cusseglier naziunal dal 2019 fin l'onn passà.
Regenza da la Turgovia en la medema constellaziun
Il suveran dal chantun Turgovia ha elegì tut la regenza en l'emprim scrutini. Denise Neuweiler da la Partida populara svizra e la socialdemocrata Sonja Wiesmann ch'èn da nov en la regenza han defendì ils sezs libers da lur partidas.
Ils cussegliers guvernativs da fin ussa ha il suveran reelegì. La regenza dal chantun Turgovia sa cumpona uschia da dus politichers da la PPS e mintgamai in da la PS, la PLD e l'Allianza dal Center. Las duas cusseglieras guvernativas da fin qua, Monika Knill da la PPS e Cornelia Komposch da la PS, n'han betg pli candidà per in'ulteriura perioda d'uffizi.
