Liquidar dumondas d'asil pendentas, integrar dapli persunas fugidas en il martgà da lavur, cumbatter la criminalitad organisada e la violenza a chasa ed er discriminaziun da pajas: Suenter 100 dis en uffizi ha il nov cusseglier federal da la Partida socialdemocratica Beat Jans preschentà ses accents politics.
Sia lavur vul il schef dal departament da giustia e polizia drizzar al princip «Zämme goht’s besser». La Svizra vivia da la prontadad da las forzas politicas da s’alliar, vegn Jans cità en ina communicaziun da mardi.
Pir questa prontadad ha purtà a nus segirtad e libertad.
Il Basilais da 59 onns è il successur d'Alain Berset e dapi l'emprim da schaner minister da giustia. Tenor ina retschertga da Tamedia e «20 Minuten» publitgada il mars, è el il cusseglier federal ch'è il mument il pli popular.
Il favrer aveva Jans annunzià mesiras per che persunas che n'han strusch perspectivas da survegnir asil fetschian damain dumondas d'asil. Tranter auter duain las proceduras d'asil da 24 uras vegnir amplifitgadas.
Or da l'archiv:
