La finala è cun Beat Jans in dals dus umens dal ticket socialdemocratic vegnì elegì en il Cussegl federal sco successur d'Alain Berset. En tut hai duvrà trais scrutinis enfin che Jans ha gì la maioritad absoluta. El ha survegnì 134 vuschs da 245 vuschs valaivlas. Il pli absolut era tar 123 vuschs.
Il segund meglier resultat ha en tut ils trais scrutinis il Turitgais Daniel Jositsch fatg. Uschia è lez stà avant Jon Pult, quai che munta ch'ina part da las parlamentarias ed ils parlamentaris ha betg elegì tenor il ticket da la PS. En il terz scrutini ha Jositsch fatg 68 vusch, Jon Pult be 43 vuschs.
Servir a la «scheffa» ch'è per Jans il pievel svizzer
Cun l'applaus da l'Assamblea federala è il nov cusseglier federal Beat Jans entrà en la sala, suenter sia elecziun. Commuventà ha el salidà ses amis da partida e sia famiglia sin la tribuna d'aspectaturs.
En ses pled d'engraziament ha Beat Jans empermess da s'engaschar cun tutta forza per il bainstar dal pievel svizzer. El veglia procurar ch'era las generaziuns vegnintas hajan la schanza da manar ina buna vita. Ed en il temp da crisa actual haja num per tuts da far pass in vers l'auter.
Mes eschs èn adina averts per vus, stimads commembers da l'Assamblea federala.
La finala ha Jans era engrazià a sia famiglia per il sustegn en buns e schlets temps, ed a la partida ch'haja adina puspè purschì ad el schanzas.
Suenter 50 onns in represchentant da Basilea Citad
Uschia ha Basilea Citad il terz cusseglier federal en l'istorgia dal chantun, e l'emprim dapi 50 onns. L'ultim cusseglier da Basilea Citad è stà il socialdemocrat Hans-Peter Tschudi ch'era sa retratg la fin dal 1973.
Uschia ha Beat Jans impedì ch'i dat suenter passa 100 onns puspè in cusseglier federal che discurra rumantsch.
Reelegì tut ils cussegliers e cusseglieras en uffizi
Tar las ulteriuras elecziuns n'hai dà naginas surpraisas. Tut ils magistrats en uffizi èn vegnids elegids mintgamai en l'emprim scrutini.
Repartiziun da departaments
Cun la demissiun da Alain Berset è il Departament federal da l'intern liber. Ils departaments vegnan repartids da nov tranter il nov elegì Cussegl federal. Qua vala il princip d'anzianitad: pia tgi ch'è il pli ditg en uffizi dastga tscherner il departament. Il nov elegì ha da prender il departament che resta. Davart midadas da departament n'è betg enconuschent bler. Speculà vegn sulettamain che Ignazio Cassis pudess midar en il Departament federal da l'intern, cunquai ch'el è medi e l'uffizi da sanadad è part da quest departament.
