Tgi che na saja betg vaccinà cunter Covid-19, stoppia quintar anc pli ditg cun restricziuns. Quai ha ditg il president da la Confederaziun, Guy Parmelin, en l’intervista cun la »Sonntagszeitung«. Concret stoppia il Cussegl federal forsa prolungar la regla da 2G per il sectur da temp liber, uschia che p.ex. be persunas vaccinadas e guaridas pudessan ir en restaurants.
Betg discriminar vaccinadas e vaccinads
Definitivamain decis davart in obligatori da la regla da 2G n’ha il Cussegl federal anc betg. El ha pir tramess questa proposta en consultaziun il venderdi. Plinavant ha Parmelin suttastritgà en l’intervista ch’ins na dastgia betg prender la libertad a persunas vaccinadas, mo perquai ch’autras persunas na sajan anc betg immunisadas cunter il coronavirus.
Lévy: La varianta omicron vegn bainprest a dominar
La directura da l’Uffizi federal da sanadad, Anne Lévy, beneventass in obligatori da la regla da 2G. La varianta omicron pudess dominar en Svizra fin il pli tard la fin da l’onn. I dovria perquai plaz en ils ospitals, ha ditg Lévy en l’intervista cun il «SonntagsBlick». Uss saja impurtant da rumper l’unda da la varianta delta. En vista al dumber da novas infecziuns, saja inevitabel dad introducir la regla da 2G en l’entir pajais. La regla da 2G porschia per buna part segirezza a persunas vaccinadas e guaridas. Per persunas betg vaccinadas n’haja la directura dal BAG nagina chapientscha.
Lockdown a fin en Austria
En l’Austria va oz il lockdown da trais emnas a fin. Butias, teaters ed indrizs da temp liber èn puspè averts. A partir da damaun avra er il commerzi. Vinavant restar en il lockdown ston dentant persunas betg vaccinadas cunter Covid. Ellas dastgan be bandunar lur dachasa sut circumstanzas, sco per exempel per ir a lavurar u far cumissiuns. Ultra da quai datti differenzas tranter ils singuls Bundesländer. Uschia avran oz be en il Tirol, il Voralberg ed il Burgenland ils restaurants.
