L'Uffizi federal d'ambient (BAFU) aveva refusà il 2021 la dumonda dal chantun da pudair sajettar il bab dal triep dal Beverin cun il num «M92». Il chantun Grischun ha silsuenter fatg recurs al Tribunal administrativ federal.
Il tribunal ha ussa dà raschun al chantun. Sco ch'il tribunal scriva, saja las pretensiuns per cumprovas dal BAFU stadas memia grondas. Per lez valevan be cumprovas da DNA sco cumprovas suffizientas per mussar ch'il luf haja chaschunà gronds donns.
Betg be provas da DNA
Igl è l'emprima giada ch'il Tribunal administrativ federal decida ina dumonda fundamentala dal dretg da cumprova, che pudess sa tschentar era en il futur tar la regulaziun da lufs e la dumonda cura ch'ils chantuns survegnan la lubientscha per sajettar lufs-geniturs.
Co ch'il tribunal scriva, saja simplamain necessaria ina cumprova ch'il luf-genitur saja stà participà vi dal donn. La prova da DNA n'è betg l'unica opziun. Gia durant il process giuridic haja l'Uffizi federal d'ambient acceptà quai ed accepta era ils suandants mussaments:
- Fotografias u registraziuns da films che mussan in specific luf
- La metoda co che l'animal è vegnì mazzà
- Da nov na vala in luf-genitur betg mo sco «particularmain donnegius» sch'el ha contribuì almain a 2/3 ad in donn.
- Cumportament problematic possia esser sch'in luf-genitur haja emprendì da siglir sur saivs electricas ora. Quai possian ils giuvens emprender da l'animal vegl.
En singuls cas possian ins era duvrar la metoda co ch'in animal è vegnì mazzà sco cumprova – sch'il stgarp po vegnir identifitgà cleramain ed attribuì ad in specific luf. La formulaziun per in animal particularmain donnegius en l'ordinaziun da chatscha saja formulada averta. In cumportament problematic possia esser sch'in luf-genitur haja emprendì da siglir sur saivs electricas ora. Quai possian ils giuvens emprender da l'animal vegl. L'effect d'emprender sa mussia sch'ils animals vegls mussian il cumportament repetidamain, quai saja da cumprovar cun fotografias, videos, provas da DNA u observaziuns protocolladas. Era qua remartga il tribunal, che la glista da mussaments na saja betg serrada, e na possia era betg vegnir limitada sin cumprovas da DNA.
La fin d'october 2022 ha il BAFU dà la lubientscha per sajettar a «M92» – er senza cumprova da DNA. La notg dals 8 sin ils 9 da november è el vegnì sajettà. Tras quai n'èsi betg pli necessari da sclerir en retrospectiva las ulteriuras dumondas giuridicas, scriva il Tribunal.
La sentenzia po vegnir contestada davant il Tribunal federal.
Cumpetenzas:
- tracta recurs cunter ordinaziuns da l'administraziun federala
- controllescha per part era decisiuns chantunalas
La dretgira ha la Sedia a Son Gagl, occupescha 72 derschadras e derschaders ed è la pli gronda dretgira federala. Ella fa radund 6'500 decisiuns l'onn. Il tribunal datti dapi l'onn 2007.
