Il survegliader dals pretschs, Stefan Meierhans, ha survegnì l’onn passà dapli reclamaziuns da burgaisas e da burgais ch’anc il 2022. Il dumber saja s’augmentà per bun 400 sin 2'775 reclamaziuns. Quai ha communitgà il survegliader dals pretschs a chaschun da sia bilantscha annuala.
Las bleras reclamaziuns – numnadamain 20% hajan pertutgà pretschs e tariffas dal sectur d’energia. Sin il segund e terz plaz suondian reclamaziuns pertutgant il sectur da la sanadad respectivamain il traffic public.
Dapi il 2021 èn las annunzias bunamain sa dubladas, sco Meierhans di. Quai saja in segn che la populaziun fetschia adina dapli quitads pervi dals custs da viver. Per il survegliader dals pretschs èn oravant tut interpresas cun stretga colliaziun cun la Confederaziun dumandadas. L'onn passà haja el pudì sa cunvegnir tant cun la Posta, sco era cun l'organisaziun da branscha dal traffic public, Alliance Swisspass. Tar la Posta hajan ins pudì reducir l'augment da pretsch per 40%.
Ulteriuras pussaivladads per sbassar ils custs
Era tar l'electricitad vesa il survegliader da pretschs pussaivladads da reducir ils custs. Tenor Meierhans sajan las tariffas d'utilisaziun dapi onns memia autas – per la populaziun sco era per l'economia.
Plinavant vul Meierhans intercurir pli en detagl ils pretschs da benzin e diesel ch'èn s'augmentads – spezialmain las marschas da las raffinarias e dals tancadis. L'augment da pretschs sajan be per part da giustifitgar cun ils pretschs d'ieli brut ch'èn era creschids.
