Pertutgadas sajan stadas persunas tranter 85 fin 92 onns cun malsognas preexistentas. En nagins dals sis cas dettia indizis ch'il vaccin haja chaschunà la mort. Tenor quai ch'ins sappia uss, sajan per exempel infecziuns, problems cun las avainas u malsognas dal lom e da las vias respiratoricas stadas il problem. Talas malsognas dettia pli savens tar persunas en quella vegliadetgna. Per il mument vegnan sur tut persunas sur 75 onns vaccinadas.
Dunnas pli ferm pertutgadas
En ils auters cas gravants saja sur tut ì per la respiraziun che gieva pli vess, unfladiras vid la pel u eczems. Er sintoms sco tar la grippa, sco fevra auta e mal las giugadiras haja dà.
Las ulteriuras 37 annunzias betg gravantas sajan stadas cas da mal il chau, snavurs, fevra e mal là nua che l'injecziun saja vegnida fatga. En ils 63 cas annunziads fin uss sajan dapli dunnas ch'umens stadas pertutgadas.
