Dapi ch'il vitget vallesan Blatten ha stuì vegnir evacuà la mesemna, ils 21 da matg, è la situaziun s'intensivada adina dapli. L'entschatta da l'emna era gia ina buna part da la crappa instabila da la flanca ost dal grip crudada giu – part da quella era lura sa tschentada sin il glatscher Birch al pe dal «Kleines Nesthorn».
La paisa da quella glera ha fatg ch'il glatscher sa mova adina pli spert en direcziun val. Gia il venderdi passà sa muveva quel – tenor las calculaziuns dals experts – cun ina spertadad da radund dus fin dus e mez meters a di a val.
Tschintg dis pli tard è lu la disfortuna, ch'aveva fatg gronds quitads als experts, daventada realitad: La glera ha mess ina tala pressiun sin il glatscher Birch ch'ina gronda part da quel è rut giu la mesemna, ils 28 da matg, vers mesa las quatter. Quai ha creà ina bova da glatsch, glera e crappa tarmenta, ch'è ida a val ed ha tutgà e destruì la gronda part dal vitg da Blatten – numerus bajetgs èn sutterrà u donnegià ed ina dunan indigena da 64 onns vala anc adina sco sparida, rapportan las agenturas da novitads. Las forzas d'intervenziun e las autoritads al lieu emprovian cun tutta forza da survegnir ina survesta da la situaziun.
Dus scenaris èn stads pussaivels
En il meglier cas fiss be la part davant dal glatscher rutta giu, e betg l'entir glatscher – quai è il venderdi passà anc stà la gronda speranza da las autoritads vallesanas, en lur communicaziun dals dus scenaris pussaivels. Tenor quellas avess il vitget da Blatten en lez scenari probablamain gì cletg e fiss restà per gronda part intact. Il material che fiss vegnì a val avess lura numnadamain be tutgà ina zona limitada dal vitg.
Enstagl è il segund scenari difavuraivel – ch'ha constantamain fatg gronds quitads als experts – daventà realitad la mesemna, ils 28 da matg, pia tschintg dis suenter ch'ils dus scenaris pussaivels èn vegnids presentads. Sco temì è la paisa sin il glatscher creschida constantamain pervia da la glera fin ch'ina gronda part dal glascher è la finala sa schliada. La bova da glitta termanenta ha, sco prognostitgà da las autoritads vallesanas, purtà consequenzas desastrusas per il vitg vallesan. La gronda part dal vitg è sutterrada e numerus bajetgs èn destruids.