«Igl è schont ina tscherta tensiun», di Stefan Engler. Il prim da december surpiglia il Surmiran il presidi dal Cussegl dals chantuns. Intensivamain sa prepara il politicher da la partida il Center actualmain sin questa sfida. «La preparaziun è l'A e l'O», di Engler. Sia prioritad per l'onn presidial è da manar il Cussegl dals chantuns bain tras las debattas cun respect envers ils collegas. Dentant era la dignitad envers l’instituziun è per el d'impurtanza. Uschia vul il parlamentari grischun rinforzar durant l'onn presidial la qualitad da las leschas che vegnan fatgas. La qualitad saja tenor el ida enavos ils ultims onns.
Jau na sun betg in schuldà da partida.
Sco Rumantsch haja el era ina responsabilitad per il rumantsch. Durant l'onn duai il rumantsch era survegnir ina plattafurma. Cun preleger e declerar proverbis rumantschs a las politicras ed ils politichers dal Cussegl dals chantuns vul Stefan Engler dar visibilitad a sia lingua materna.
Per el è la cardientscha in cumpass ch'el piglia era cun el en l'onn presidial. Quel cumpass gidia el da betg sa laschar en sin polemica, lobists ni auters facturs. Uschia na saja el era betg in schuldà da partida. El decidia tenor ses principis.
Nagin smoking e nagina festa
In principi da Stefan Engler è ch'el na porta betg in smoking. Quai ha el era communitgà uschia als servetschs dal parlament. El na vul betg sa costumar per l'uffizi ed uschia restar autentic. Cun in rir di el, ch'el na giaja schont betg sc' in clown ad occurrenzas uffizialas. Sco politicher è Stefan Engler plitost in che lavura davos las culissas e na tschertga betg l'attenziun mediala. Quella ha el dentant survegnì perquai ch'el ha decidì da betg far ina festa sco quai ch'igl è tradiziun cura ch'ins daventa president. Pli gugent vul el ir durant l'onn presidial en las regiuns grischunas a sa barattar cun la populaziun ed era il viadi dal Cussegl dals chantuns duai proxim onn esser en las valladas grischunas.
