Siglir tar il cuntegn

Header

cuntegn

Carta da la cassa da malsauns Blers spetgan anc sin la nova carta

Dieschmillis da Svizzers e Svizras èn actualmain senza la carta d’assicuranza da lur la cassa da malsauns. Cassas sco la Helsana, la CSS e la Swica hajan retard cun trametter la carta d'assicuranza a lur clientella, scriva la «Sonntagszeitung».

Chaschunà quest retard hajan las bleras persunas che han midà lur assicuranza da basa, ha il pledader da la federaziun da cassas da malsauns, Santésuisse ditg a la «Sonntagszeitung». Uschia na vegnia il producent da las cartas betg da furnir avunda spert las cartas.

Sche la carta da la cassa da malsauns manca, pudess quai per exempel procurar per problems sin viadis en l’exteriur, scriva la gasetta. Dentant era en Svizra procuria quai per dapli lavur administrativa, damai ch'i haja num da dar en datas a maun.

Autras cassas han fatg quai meglier

Betg pertutgada dal problem è la cassa da malsauns Concordia. Ins haja reservà baud avunda capacitad da producziun tar il furnitur da las cartas, ha l'interpresa inditgà a la gasetta. Il pledader da Santésuisse ha perquai era pauc chapientscha per ils retards tar autras cassas da malsauns. Quellas avessan pudì prevesair il basegn pli grond da cartas.

audio
Per tadlar: las novitads da las 10:00
ord RTR Audio dals 08.01.2023.
laschar ir. Durada: 3 minutas 8 Secundas.

RTR novitads 09:00

Artitgels legids il pli savens