Tenor il Tribunal federal administrativ hai mai dà ina basa legala per surdar incumbensas administrativas ordvart l’administraziun federala.
Mo gist quai aveva l' autoritad che survegliescha la Procura publica federala fatg il zercladur passà, cun surdar l’inquisiziun disciplinara cunter il procuratur public Michael Lauber a Peter Hänni – in expert extern. Ed en quella funcziun aveva Hänni er decidì che dus advocats da Lauber na sajan betg lubids pervi da conflicts d'interess. Sinaquai aveva Lauber fatg recurs al Tribunal administrativ federal cunter questa decisiun.
Nagin dretg da delegar l'inquisiziun
Ils derschaders da Son Gagl n'èn uss betg entrads en quai recurs, perquai ch’el ha constatà che l'autoritad da surveglianza n'avess gnanc dastgà delegar l’inquisiziun disciplinara ad in extern. Uschia han era sias decisiuns nagin effect. Pussaivel è dentant ch’il vi e na giuridic cuntinuescha. Cunter questa decisiun èsi pussaivel da far recurs al Tribunal federal a Losanna.
Surveglianza reagescha
L’autoritad da surveglianza da la Procura publica federala surpiglia per immediat il timun da l’ inquisiziun disciplinara en il cas «Lauber». Uschè ha la surveglianza communitgà curt suenter che la decisiun dal Tribunal federal è vegni public. Els èn conscients ch'il cas saja urgent, perquai na vulan els era betg pli perder temps, di la surveglianza.
Politica vul resultats
Tut quest «vi e na» fetschia mo donn a la procura publica sez. Quai di il cusseglier naziunal e commember da la cumissiun da dretgira, Matthias Aebischer. Il president da la cumissiun, Jean-Paul Gschwend, ha dentant detg che la cumissiun vul il pli tard l'entschatta settember decider sch'els vulan proponer Lauber per la reelecziun u betg. Quai cun u senza resultats da l'inquisiziun.
Il problem è, ch'il mandat da Michael Lauber scroda per la fin da l’onn. Fin là sto il parlament avair decidì sche Lauber vegn reelegì u sch'insatgi auter surpiglia ses post.
Concret sto vegnir sclerì, sche Michael Lauber avess sutvi protocollar inscunters cun il schef da la FIFA Gianni Infantino. Quai en connex cun inquisiziuns da la procura publica cunter la FIFA.
RR novitads 12:00+
