Bunas novas ha il Cussegl federal communitgà il mardi passà – che las premias da las cassas da malsauns sa sbassian il 2022; quai l'emprima giada dapi il 2008. Bunas novas però betg per tuts: Il president da l'associaziun da las cassas da malsauns Heinz Brand avertescha che quai na saja nagina mesira a lunga vista, èsi da leger en la «Schweiz am Wochenende».
Questa reducziun è motivada mo politicamain.
Cunquai ch'ils custs da sanadad na sajan betg sa reducids, muntia quai che las cassas da malsauns stoppian finanziar quai cun lur reservas. Sche quai cuntinueschia uschia, lura stoppian las cassas da malsauns ch'hajan reducì lur reservas fin sin il minimun tenor la lescha, lura auzar las premias. E quai pudessia lura esser en autras dimensiuns.
Nairas uras per refurmas e respargns
Ussa saja quai nairas uras da refurmar il sistem da sanadad e spargnar. En in communitgà aveva Santésuisse curt suenter la publicaziun da la reducziun da premias punctuà ch'ils custs da sanadad sajan creschids il 2020 per 1,1% tar l'assicuranza da basa, ed il prim semester 2021 per radund 4%. Perquai dovria quai respargns per evitar che las cassas giajan en cifras cotschnas. Propostas sajan sin maisa, sco per exempel da spargnar cun pretschs da referenza per l'import da medicaments generics ubain era tar tests da labors.