Siglir tar il cuntegn

Header

video
Alain Berset: «Las premias sa reduceschan per l'emprima giada dapi 14 onns»
Or da News-Clip dals 28.09.2021.
laschar ir
cuntegn

L'emprima giada dapi il 2008 Premias da cassas da malsauns sa reduceschan

Per l'emprima giada dapi il 2008 sa reduceschan las premias da las cassas da malsauns en media per 0,2%. Tut tenor chantun pon las premias però er crescher per 1,4% u sa reducir per 2,1%. Il Grischun po nudar ina reducziun da 0,9%. Quai ha communitgà l'Uffizi federal da sanadad.

  • Las premias sa reduceschan en media per 0,2%, l'emprima giada dapi il 2008.
  • Er ils assicurads en il Grischun profiteschan da la reducziun. En media van las premias en il chantun enavos per 0,9%.
  • La pandemia da corona n'è però anc betg resguardada.

Il Grischun profitescha

Il pli fitg profiteschan ils giuvens creschids tranter 19 e 25 onns da la reducziun da las premias. En il Grischun sa reducescha la premia per questa gruppa per 5,4% sin 222,80 francs. Per creschids, vul dir persunas sur 26 onns, sa reduceschan las premias en il chantun per 1% sin 321,60 francs. Ed er per ils uffants sa reduceschan las premias en media en il Grischun per 0,5% sin 87,20 francs.

Survista da reducziun en il Grischun

  • Creschids (a partir da 26 onns) reducziun da 1% sin 321,60 francs.
  • Giuvens creschids (19-25 onns) reducziun da 5,4% sin 222,80 francs.
  • Uffants (0-18 onns) reducziun da 0,5% sin 87,20 francs.

Er en Svizra sa reduceschan las premias

Ils custs per las chasadas svizras sa reduceschan il 2022. Quai grazia ad ina reducziun da 0,2% sin la premia media ed ina reducziun da las reservas da 1,2%. Per il 2022 munta la premia a 315.30 francs, quai correspunda ad ina reducziun da 0,2%, cumpareglià cun il 2021. Dentant: dapi il 2011 è la premia media creschida per 2,4% per onn. Dapi l'obligatori da l'assicuranza per la tgira da malsauns il 1996 schizunt per 3,5%.

Midadas fin la fin da november

Tgi che n'è betg cuntent cun la midada da las premias, po midar fin la fin da november la cassa da malsauns. Fin la fin d'october ston ils assicurads vegnir infurmads areguard las premias per il proxim onn.

L'Uffizi federal da sanadad fa attent ch'ils assicuraders ston acceptar tuttas persunas tar l'assicuranza per la tgira da malsauns obligatorica. I vala l'obligaziun da s'assicurar. Per ch'ins possia midar cassa, dovri il mussament dad in'autra assicuranza.

Cussegl federal vul reducir las reservas

Las cassas da malsauns vegnan a pajar enavos 380 milliuns als assicurads. Quai ha ditg il cusseglier federal Alain Berset avant las medias. Las reservas actualas da 12 milliardas francs sajan memia autas. La limita minimala è tar 6 milliardas. Questas reservas tutgian als assicurads, uschia Berset. Differentas cassas hajan fatg propostas a l'Uffizi federal da sanadad, co ch'ellas possian reducir las reservas.

video
Alain Berset: «Reservas da 12 milliardas francs èn simplamain da memia»
Or da News-Clip dals 28.09.2021.
laschar ir

Reducir ils custs da sanadad saja ina gronda finamira per il Cussegl federal. Pervia dal svilup demografic vegnian ils custs er a crescher en il futur. Il Cussegl federal veglia dentant reducir quests custs ed ha ord quest motiv preparà dus pachets cun mesiras. In'emprim pachet è tar il parlament. In segund pachet duai vegnir preschentà il 2022. Il potenzial da spargn saja tar plirs milliuns francs.

Pandemia da corona n'è anc betg integrada

Malgrà las bunas novitads: La reducziun da las premias na mussa betg las prestaziuns dals ospitals e dal sistem da sanadad durant la pandemia. Pervia dal stop da tractaments durant la primavaira dal 2020 n'èn anc betg tut ils custs cuvrids. Las consequenzas medicinalas ed economicas da corona vegnan a sa mussar pir en ils decurs dals proxims onns.

video
Alain Berset: «La pandemia è stada ina gronda sfida»
Or da News-Clip dals 28.09.2021.
laschar ir

RTR novitads 15:00

Artitgels legids il pli savens

Scrollar a sanestra Scrollar a dretga