Siglir tar il cuntegn

Header

Certificats da Covid: Chantuns crititgeschan Confederaziun
Or da Tagesschau dals 07.01.2022.
cuntegn

Certificats sfalsifitgads Chantuns crititgeschan pratica da tschentar or certificats

Ils chantuns n'èn insumma betg cuntents cun la pratica da la Confederaziun da tschentar or certificats da Covid. Il sistem actual promovia directamain cugliunarias. Perquai saja da limitar las persunas autorisadas. Da quest avis è er la media chantunala dal Grischun, Marina Jamnicki. Actualmain hajan pliras milli persunas access a la software da certificats. Centers da testar possian schizunt tschentar or certificats da Covid, malgrà ch'els na porschian gnanc vaccinaziuns. Ils chantuns na veglian tranter auter betg che tuts possian tschentar or tut ils tips da certificats. Plinavant n'hajan ils chantuns strusch la pussaivladad dad analisar. Perquai pretendan els da survegnir directamain invista en il sistem, per uschia savair tgi che tschentia or cura e quants certificats.

La discussiun è vegnida sin maisa suenter ch'ins ha chattà millis da certificats sfalsifitgads.

BAG reagescha

Sco l'Uffizi federal da sanadad ha communitgà envers SRF, saja il sistem da tschentar or certificats construì uschia, ch'in grond dumber da persunas possia tschentar or quels. Uschia saja ina sfida per ils chantuns da controllar las persunas autorisadas. Questa obligaziun avessan ils chantuns dentant er uschiglio. En vista als divers cas da falsificaziun veglia il BAG adattar sia pratica. I duaja dar ina gruppa da lavur che megliureschia il monitoring. Quella duaja sa cumponer da represchentants da la Confederaziun e dals chantuns. Uschia duajan cas da suspect vegnir standardisads e vegnir furnids regularmain als chantuns. En pli duaja il concept d'autorisaziun vegnir surlavurà. Dentant na saja anc betg cler, cura che quai duaja capitar.

RTR novitads 06:00

Artitgels legids il pli savens

Scrollar a sanestra Scrollar a dretga