Igl è stà ina premiera: Per l'emprima giada hai dà en la citad da Turitg in cortegi da Chalandamarz. La scola e la canorta rumantscha da Turitg han ensemen cun la Lia Rumantscha organisà quell'occurenza per ils uffants da la Bassa. E quai cun tut quai che tutga vitiers: plumpas, rosas, blusas da Chalandamarz – e natiralmain er la chapitscha cotschna.
Per ils uffants èsi surtut stà in grond plaschair da far il til tras la citad, far in zic canera – e vegnir filmads e fotografads da las Turitgaisas ed ils Turitgais ch'han gì grondas mirveglias. Per tscherts geniturs èsi stà bel da pudair pussibilitar a lur uffants da far sumegliantas experientschas sco ch'els avevan fatg d'uffants e per ils organisaturs èsi stà bel da pussibilitar in'ulteriura chaschun per Rumantschs e Rumantschas da vegnir ensemen e da rinforzar la cuminanza rumantscha da Turitg e conturn.