Ils giuvens battasendas tranter 10 e 13 onns han bajegià si lur tendas ensemen cun lur manaders e manadras. Ils Battasendas Engiadin'Ota partan lur quartier cun ina gruppa da Tavau ed ina gruppa da Viamala. En tut èn els radund 20 uffants.
Nus avain tendas per ils manaders e las manadras e per ils uffants. Las giuvnas dorman ensemen en ina tenda ed ils giuvens. Nus avain era duas tendas grondas nua che nus mangiain e stain da cumpagnia.
Bler program
Mintga di han els program – organisà dals manaders u dal BuLa sez. Els fan gieus, zambregian, s'entaupan cun las autras gruppas u emprendan d'enconuscher chaussas culturalas dal Vallais. Era sch'ins n'haja betg bler contact cun las gruppas che sajan lunsch davent da lur quartier, fetschian ins almain mintgatant insatge cun ils vischins. Ils Battasendas Engiadin'Ota èn datiers d'ina gruppa da Genevra, da Basilea e da Turitg.
Anc mai uschè bleras battasendas
Dapi la fin d'emna èn giuvenils da tut ils chantuns svizzers en viadi vers Goms en il Vallais. Els arrivan cun il tren e bus. Il champ da battasendas federal – il BuLa – ha lieu be mintga 14 onns. Anc mai eran uschè bleras battasendas reunidas en in champ sco quellas duas emnas a Goms. Las ultimas giadas èn quellas sa radunadas decentral en plirs champs. La co-organisatura Krista Kappeler è cuntenta che tut gira sco planisà:
Gronda infrastructura
Per il champ da battasendas federal han ins drizzà ina gronda infrastructura. Per il vitg da tendas vegn duvrada ina surfatscha che ha plaz per uschè bleras persunas sco las citads da Zug u Dübendorf. La «citad da battasenda» cumpiglia in champ da tendas ed edifizis ils pli impurtants.
Il moviment dals battasendas è la pli gronda organisaziun da giuvenils en Svizra.
Bula a fin
Sonda ils 6 d'avust è il camp federal dals battasendas ì a fin a Goms en il Vallais. Ils organisaturs èn stads fitg cuntents cun tut la lavur prestada gratuita. Radund 700'000 uras voluntaras hajan ils responsabels prestà. Dasper las activitads organisadas cun ils uffants e giuvenils hajan ultra da quai er 20'000 persunas visità il camp.
Or da l'archiv:
Il 2018 han ils Battasendas en Grischun festivà lur giubileum da 100 onns. Il Telesguard ha rapportà: