Il chantun Vad reagescha cun novas mesiras sin il dumber creschent da corona:
- Locals da notg e discos vegnan serradas.
- Occurrenzas privatas cun passa 100 persunas èn scumandadas ed
- a partir da 50 persunas ston ins purtar mascras.
- Purtar mascras en restaurants e bars è obligatori.
Quellas mesiras valan a partir da gievgia. 40% da tut ils cas da corona en Svizra pertutgan il chantun Vad. Cunzunt glieud giuvna tranter 20 e 39 onns s'infecteschan pli savens. Tenor la directura da sanadad, Rebecca Ruiz, pudessi bain esser, ch'in ospital n'ha prest naginas capacitads pli. La situaziun na saja dentant anc betg precara.
Cifras actualas
315 infecziuns novas cun il coronavirus ha l'Uffizi federal per sanadad BAG annunzià oz. Trais da quellas sajan capitadas en Grischun. Tenor BAG èn 3,6% dals tests ch'èn vegnids fatgs la davos'emna stads positivs.
