Cun producir gasettas pli satiglias e vender ellas pli charas reageschan las chasas edituras sin ils pretschs dal palpiri ch’èn creschids. Il 2022 è il palpiri stà enfin dubel uschè char che l’onn avant.
Raschun saja cunzunt il pretsch aut da gas ch'è da gronda impurtanza per la producziun da palpiri, di Michele Paparone da Ringier Axel Springer Svizra. Per la chasa da medias «CH Media» munta il palpiri pli char custs supplementars da milliuns. La «TX-Group» inditgescha schizunt custs da 25 milliuns francs, quai correspundia a bun in quart dal gudogn annual.
Futur da las gasettas betg periclità
Andrea Masüger, l’anteriur CEO da la Somedia e president actual da l’associaziun dals editurs da las medias svizras discurra dad ina situaziun propri dischagreabla per las chasas edituras. Las lecturas e lecturs prefereschian però anc adina las gasettas en furma stampada. Ina midada tar formats digitals na saja betg giavischada.
