Tranter l'emprim da december e fin schaner èn 27 lufs vegnids sajettads en il Vallais en il rom da la chatscha preventiva lubida da la Confederaziun. La finamira da 34 lufs fin la fin da schaner saja uschia bunamain cuntanschida, han communitgà las autoritads vallesanas.
Cun quai hajan ins surpassà las spetgas. Al cumenzament da l'acziun ha il chantun Vallais ditg che tranter 10 fin 15 lufs fiss gia in grond success.
Il pli fitg hajan ins pudì decimar ils trieps da Augstbord cun 11 animals e quel da Val d'Hérens cun 9 animals. Plinavant hajan ins sajettà dus lufs dal triep da Nanz, trais a Les Toules e dus dal triep da Chablais.
Da 13 trieps tuttina be 4 pertutgads
Oriundamain vuleva il Vallais eleminar set da 13 trieps. Recurs da diversas organisaziuns d'ambient cunter la regulaziun proactiva ha la finala salvà trais da quels, ina situaziun ch'igl ha er dà en il Grischun. Mez december ha il Tribunal administrativ federal concedì in recurs d’organisaziuns per la protecziun da l’ambient. Il chantun Vallais ha sinaquai stuì sistir la chatscha sin ils trais trieps da Hauts-Forts, Nanz e Le Fou-Isérables. Fin lura aveva il chantun sajettà l'onn 2023 preventivamain 10 lufs e quatter lufs singuls tenor la regulaziun federala.
Dals 27 lufs ch’èn vegnids sajettads preventivamain eran 16 chagniels ed 11 animals creschids, sco che Nicolas Bourquin, schef dal post chantunal per chatscha, pestga ed animals selvadis, ha ditg glindesdi avant las medias a Sion. Quatter da quels lufs han chatschadurs privats sajettà cun permissiuns spezialas, ils ulteriurs animals èn vegnids sajettads dals guardiaselvaschinas.
En il Vallais han ins il 2023 identifitgà geneticamain en tut 71 lufs cun lur DNA. La fin da l’onn vivevan anc 46 dad els oravant tut en il sid dal Rodan (Rhone). Ils circa 100 lufs che vivan tenor stimaziuns en il Vallais han stgarpà 401 animals da niz, quai suenter 405 l’onn precedent.
Adattà al tema
