La banca gronda UBS ha sentì ferm la crisa da corona il segund quartal da l'onn da fatschenta. Il gudogn saja sa reducì per 11% sin 1,2 milliardas dollars. Quai ha communitgà la banca gronda a Turitg. L'UBS declera questa diminuziun cun reservas ch'ella haja stuì far pervi da credits che pudessan crudar ora. Cun quest resultat ha la banca surpassà las spetgas dals analists.
Sur l'entir emprim semester saja il gudogn net dentant s'augmentà per 12% sin 2,8 milliardas dollars. Las prognosas per l'avegnir èn sco usità plitost precautas. La banca gronda quinta er la segunda mesadad da l'onn cun ulteriuras rectificaziuns da la valur.
Terminà dispita giuridica en ils Stadis Unids
En ina dispita è la UBS vegnida perina cun l’autoritad da surveglianza da la bursa americana SEC da pajar 10 milliuns dollars. Quai ha communitgà la SEC.
Ella aveva renfatschà a l’UBS d’avair purschì a tscherts cumpraders d’emprests communals cundiziuns avantagiusas durant quatter onns.
Quels han lura subit puspè vendì ils emprests e han fatg in gudogn cun quai. Igl haja dà passa 2’000 talas transacziuns. L’UBS n’haja ni admess ni snegà quai, uschia la SEC.
