Il consum da sal da Svizras e Svizzers sa chatta var 75% sur il quantum recumandà da 5 grams per di. Ed ils umens mangian cun mintga di perfin 10 grams il dubel dal quantum recumandà, mussa in nov studi. Las dunnas mangian en media 7,4 grams sal al di, sco che l'Uffizi federal da segirezza alimentara e fatgs veterinars BLV ha infurmà.
Il consum il pli aut registreschan umens tranter 45 e 59 onns cun ina quantitad dad en media bunamain 11 grams per di. Dunnas sur 60 onns han il pli pitschen consum cun mintga di 6,7 grams. In consum da sal memia aut datti en tut las regiuns linguisticas, sco ch'il segund studi svizzer da sal 2022-2023 mussa enavant. 90% dals dumandads hajan dentant inditgà da mai ensalar suenter las spaisas u mo mintgatant.
-
Bild 1 von 2. Ina suletta tratga pronta ha la quantitad da sal ch'ins po recumandar. Bildquelle: Keystone.
-
Bild 2 von 2. En futur forsa in zic pli pauc da quests sin maisa? Bildquelle: Keystone.
Victualias elavuradas èn il motiv
Il motiv per il consum da sal memia gronda sajan victualias elavuradas. Passa trais quarts dal sal da cuschinar vegnian absorbads uschia. Uschia pon ins tenor il BLV mangiar cun ina suletta tratga pronta la quantitad da sal ch'è recumandada.
Igl è il segund studi dal BLV davart il consum da sal suenter l'onn 2010/11. Bain saja il consum cun 8,7 grams per di levamain pli bassa che lezza giada. El saja dentant anc adina var 75% sur la quantitad da maximalmain 5 grams per di che vegn recumandada da l'organisaziun mundiala da la sanadad (WHO).