Che persunas fiman malgrà las consequenzas negativas per la sanadad ha differents motivs. Per tschertas è il fimar ina reacziun sin il squitsch da gruppa, auters han cumenzà or da mirveglia ed èn vegnids dependents. Auter na cumenzan mai a fimar ed anc auters fan il pass e smettan da fimar suenter in temp.
Chalar da fimar
Avant 10 onns ha Gabi Grob da Samedan chalà da fimar. Per ella ha questa decisiun per gronda part gì avantatgs.
- Ella metta da la vart mintga di 10 francs, uschia vesa la dunna da 60 onns quant ch'ella spargna dapi ch'ella ha chalà da fimar.
- Ella ha er bler dapli temp. Per exempel durant la pausa da 20 minutas na sto ella betg pli far prescha da baiver in café, fimar ed anc discurrer cun ils collavuraturs e las collavuraturas.
- Gabi Grob po ir a spassegiar senza far pausas da fimar u pausas per trair il flad. Uss po ella chaminar ed era discurrer entant, senza ch'ella tschivla.
In dischavantatg è ch'ella ha prendì tiers var 10 kilos suenter ch'ella ha chalà da fimar. Dentant è quest dischavantatg sparì cun quai ch'ella vegn da sa muventar dapli, saja quai da chaminar u ir cun velo.
Ina dumengia saira eran nus sin il balcun ed avain ditg, questa è l'ultima cigaretta.
Accumpagnament professiunal per smetter da fimar
La cussegliadra per chalar da fimar, Sandra Lauterer da l'Ospital chantunal Grischun accumpogna persunas durant la dischintoxicaziun. Per la gronda part ha ella da far cun pazients e pazientas da l’ospital. Ella discurra ed accumpogna ils clients e las clientas per trais emnas e mussa tge pussibilitads ch’i dat. Agids da chalar èn per exempel plasters, tablettas u sprays che remplazzan il nicotin. Dapli che 90% da quels e quellas che visitan la cussegliaziun reusseschan a chalar da fimar a lunga vista. La purschida è fitg dumandada, l’onn 2007 è vegnì lavurà 20% en quest post. Ussa, 15 onns suenter lavuran Sandra Lauterer ed ina collavuratura 120%.
Stumbels da cigarettas
L'organisaziun «Stop2Drop» datti dapi il 2019, sia finamira è da rimnar stumbels da cigarettas. Quels fan numnadamain donn a l'ambient. Tar l'acziun naziunala da rimnar stumbels dal 2023, che dira dals 9 fin ils 23 da matg, vul l'organisaziun rimnar in milliun stumbels.
Or da l'archiv:
