Tenor l'organisaziun mundiala da la sanadad WHO sa tschentan mintg'onn 340-680 milliuns kilograms stumbels da cigaretta giun plaun. Quels ruments u era littering da stumbels da cigaretta han ina schletta influenza sin l'ambient. Tenor il manader da fatschenta da Stop2drop, Markus Dick, n'è quai betg mo in problem mundial mabain era fitg derasà en Svizra.
Plievgia e naiv schlian las substanzas toxicas dals mamifers. Tras quai arrivan ellas en il terren, en noss flums e lais – ed han tissientà noss entir sistem ecologic. Ils filters da las cigarettas che restan enavos sa cumponan da fibras da plastic. Ellas sa decumponan a microplastic nuschaivel. Quest microplastic vegn recepì d’animals sur il magun e vegn uschia sur il nutriment enavos tar l’uman.
Stop2drop – acziun naziunala
Sch'ins va a spass sin via ves’ins adina puspè stumbels da cigarettas che giaschan giun plaun. Quai è crudà en egl ad ina classa da scola da Burgdorf a Berna. Sinaquai è l'idea naschida da rimnar quests stumbels. La classa da scola ha mobilisà auters ch'èn era s'engaschads per far frunt a quest problem da littering ed els han fundà l'onn 2019 Stop2drop.
Per far frunt a quai ed a littering en general, ha Stop2drop lantschà ina campagna naziunala da rimnar stumbels da cigarettas. Markus Dick, il mainagestiun da Stop2drop ha mess ina clera finamira per questa acziun.
Nus vulain rimnar entaifer duas emnas 1 milliun stumbels da cigarettas.
Tuts possian sa participar. Ir sin plazzas da giugar, sper via u era en la natira e simplamain rimnar ils stumbels. Quels possian ins rimnar en ina buttiglia da PET, scriver sin la buttiglia quant bler ch'ins haja rimnà, il lieu e trametter ad els. Suenter l'acziun vegnia tut quintà ed analisà ed els sperian fitg da cuntanscher lur finamira dad 1 milliun stumbels da cigarettas. Avant dus onns hajan els fatg la medema acziun. En tut hajan dapli che 5’000 persunas sa participà a quella acziun e per radund 40'000 stumbels n'avevan els betg cuntanschì la finamira ch'igl avevan mess. Quest onn duess quai gartegiar, sche blers e bleras gidan.
Infurmaziuns co prender part a l'acziun:
In singul stumbel da cigarettas cuntegn passa 7'000 chemicalias
Ils stumbels che sa tschentan giun plaun e per part era en la natira, fan donn a l'ambient. Tenor l'Organisaziun mundiala dal la sanadad WHO cuntegn in singul stumbel passa 7'000 chemicalias. Quests tissis na sajan betg mo problematics per l'ambient, mabain era per carstgauns e cunzunt per uffants pitschens sch’i vegnian en contact cun quels stumbels. Sin plazzas da giugar dettia per part massa littering. Uffants pitschens prendan tut en bucca, sablun, terratsch e per part era stumbels da cigarettas damai che quels giaschan enturn. Quai po esser fitg privlus per in uffant pitschen, cunzunt sch'in stumbel vegn traguttì. Tenor Markus Dick, mainafatschenta da Stop2drop, hajan els deliberà l'onn passà entaifer dus mais 42 plazzas da giugar da littering.
La campagna naziunala saja fitg impurtanta per els cunzunt per sensibilisar la glieud quant bler che sa tschentia giun plaun e mussar quant toxics che quests stumbels èn pigl ambient. Activ gidar da rimnar e parter quai cun auters duai dar in stausch en il patratgar da persunas che bittan giun plaun stumbels.
Markus Dick è da l'opiniun che sche daplirs s'engaschan e fan attent il conturn quant mal ch'igl è da simplamain bittar giun plaun quels stumbels enstagl da bittar quels en in tschendrer, sche possia dar ina midada ed i dovria exnum ina midada.
En media avain nus chattà 77 stumbels da cigarettas per plazza da giugar. Insaquants n’avevan nagina, auters avevan passa 400 stumbels.
Radund 2'900 annunzias ha la Tox Info Suisse, il post uffizial da la svizra per annunzias da tissientadas registrà il davos 10 onns en connex cun uffants sut sis onns che han prendì en bucca u traguttì in stumbel d'ina cigaretta.
