Circus Lollypop - Il circus per uffants – ina visita ad Andeer

Sur l'entira plazza da scola d'Andeer s'extenda ina gronda tenda violetta. Var 40 uffants èn radunads là, in pèr gidantras e gidanters dasperas – e davantvi la manadra dal circus Lollypop, Karola Rühs.

Il circus Lollypop è per uffants da tschintg onns e fa l'entir onn in viadi tras la Svizra. Ils uffants èn vegnids da dapertut ad Andeer, ed els èn ord differents motivs qua. «Jau chat circus cool», di ina matta – ed in mat agiunta: «A mai plascha er simplamain il num Lollypop.»

L'emprim di pon els tscherner ina da diversas activitads - far gimnastica al trapez, esser in fakir, far trics magics e bler auter. La gruppa «trapez» cun var 10 uffants sa chatta en la tenda violetta cun Karola Rühs.

Sco schimgias raivan ils uffants si e giu dal trapez nair, pendan mo cun las chommas vi da la stanga e fan schizunt cupitgolas en l'aria. La manadra dal circus stat dasperas e tegna ils uffants da l'autra vart cura ch'els dovran agid.

Las autras gruppas èn repartidas sin l'entir areal da la scola primara ad Andeer – era ils fakirs, da l'autra vart da la chasa da scola. Karola Rühs va tar la proxima gruppa e mussa l'emprim, co ir enturn cun il fieu. Ina matta in pau pli veglia prenda en maun ina batgetta cun ina flomma davant, e cun moviments elegants bitta ella en l'aria la batgetta e la prenda puspè si.

Er la manadra Karola Rühs para fitg cuntenta e s'allegra sin la producziun da la fin d'emna. Ils uffants èn tranter plaschair e gnervusitad.