La midada da l'urari il december 2024 porta era ulteriurs avantatgs per Cuira. Quai scrivan las viafiers da la Südostbahn. Tranter la chapitala grischuna e Turitg datti novas colliaziuns baud la damaun ed enturn mesanotg.
Da glindesdi fin dumengia cursescha l'emprim tren davent da Cuira en direcziun Turitg gia las 4:11. En tschella direcziun, pia da Turitg a Cuira, datti da glindesdi fin venderdi in tren che parta gia las 5:12 davent da Turitg. Quel è a Cuira las 6:48. La fin d'emna cursescha quest tren tranter Ziegelbrücke e Cuira. Actualmain cursescha quest tren da glindesdi fin sonda be da Ziegelbrücke a Sargans. Là ston ins midar per viagiar vinavant a Cuira.
Trens tard la saira era durant l'emna
Cun la midada da l'urari datti era midadas tar las colliaziuns tranter Cuira e Turitg tard la saira. Da glindesdi fin dumengia datti in davos tren da Cuira a Turitg las 23:11. Da Turitg a Cuira parta il davos tren las 0:23.
Vitiers tegnan ils trens IR35, che la Südostbahn e la SBB mainan ensemen da nov era a Maiavilla ed ad Unterterzen. E per satisfar ils basegns dal grond dumber da passagiers curseschan dapli trens cun vaguns a dus plauns sin la lingia da Cuira fin a Berna. Davent da gievgia vegnan publitgadas las datas dal nov urari per tut las colliaziuns regiunalas e naziunalas.
