Il concern da commerzi en detagl Migros tschertga novs possessurs per il biro da viadis Hotelplan, la fatschenta da cosmetica ed igiena Mibelle sco era per Melectronics e SportX. Quai chaschunia ina gronda reducziun da plazzas. Il medem mument duai vegnir investì en la fatschenta principala.
La concentraziun actuala vegnia a chaschunar ina reducziun da fin 1'500 plazzas cumplainas tar la gruppa da la Migros, hai num en ina communicaziun. I saja dentant la finamira d’evitar tant sco pussaivel desditgas. Sulettamain en la gruppa da la Migros dettia actualmain radund 1'400 plazzas libras, è vegnì punctuà.
Quota da la svieuta betg enconuschenta
Quant gronda che la cumpart da la svieuta da questas firmas è, na di la Migros betg. Enconuschent è sulettamain il dumber dal biro da viadi Hotelplan che ha contribuì il 2023 1,7 milliardas francs a la svieuta da la gruppa ch'ha fatg ina svieuta da stgars 32 milliardas francs.
Migros na quinta en spezial betg tar Hotelplan e Mibelle ch'ins chattia spert in cumprader. I saja la finamira da realisar ils process da vendita a moda prudenta e conscienziusa. Els dastgassan perquai cuzzar pli ditg.
Differents motivs
Ils plans da vendita han differents motivs. Hotelplan e Mibelle n'èn betg pli s'adattads a la strategia da gruppa che preveda da focusar sin il commerzi en detagl, ils servetschs da finanzas ed il tema sanadad. Ed els hajan ordaifer la gruppa da Migros meglras schanzas da svilup, uschia il communitgà.
Hotelplan saja bain il numer in sin il martgà svizzer, global dentant relativamain pitschen. E grondezza saja decisiv en la fatschenta da viadis. Ultra da quai dettia mo paucas sinergias pertutgant la fatschenta principala da la gruppa Migros. E la missiun dal fundatur da la Migros Gottlieb Duttweiler, da pussibilitar vacanzas al pitschen um, vegnia entant ademplì bain da blers purschiders.
Per Mibelle che producescha tranter auter il med da lavar giu «Handy» u ils products da tgira «I am», saja la Migros entant be pli ina da bleras clientas. La fatschenta cun l'exteriur fetschia ora radund 70% da la svieuta. I manchia uschia pli e pli fitg la relaziun.
Tar Melectronics e SportX ha la vendita raschuns economicas: Uschia sajan quels martgads specialisads vegnids pli e pli sut squitsch pervia dal commerzi online che creschia. Ussa duain «megliers proprietaris adattads» empruvar lur cletg cun las chadainas per artitgels electronics e da sport.
Il destin dals ulteriurs martgads spezialisadas è avert
Tge che capita cun ils auters martgads spezialisads – pia Bike World, Do it + Garden, Micasa ed Obi – è anc avert. Quests formats vegnian suttamess ad ina examinaziun detagliada, hai gì num. L’onn passà han tut ils martgads spezialisads da la Migros cuntanschì ensemen be anc ina svieuta da 1,5 milliardas francs, quai che munta ina reducziun da 7,7%. Gia quella giada avev’ins discurrì d’in «ambient cun sfidas». Ch'ils martgads spezialisadas èn sin il stan da l’examinaziun è vegnì enconuschent gia lura.
Planisà investiziuns
La Migros na vul dentant betg be focusar mabain er augmentar en la fatschenta principala. Perquai ha il concern decidì in program d'investiziun. I va per ina summa da passa otg milliardas francs che stettia a disposiziun ils proxims tschintg onns. Tenor las indicaziuns duain ils daners ir tranter auter en ils supermartgads da la Migros, l'introducziun d'in nov concept da butias per Denner, en la logistica sco era l'extensiun da la fatschenta online.
Or da l'archiv:
Tut las fatschentas da victualias eran avant 100 onns anc en lieus fixs. L’idea da cumprar camiuns, emplenir quels cun victualias e bavrondas ed ir cun quels camiuns tar la glieud, quell’idea è stada la basa da la fundaziun da la Migros. E grazia a quell’idea è Gottlieb Duttweiler e sia Migros daventada il pli impurtant negozi da la Svizra.
