Dapi radund in'emna pon ins cumprar la vignetta per l'autostrada era en furma electronica. La Confederaziun venda la vignetta electronica per 40 francs – pia per il medem pretsch sco la vignetta classica. La vignetta vendan per era diversas autras paginas online; per part era per 40 francs, per part però era per 50 francs u anc dapli.
Quest pretsch pli aut – che munta tar 50 francs in augment da 25% – giustifitgeschan ils commerziants online cun taxas per lur prestaziun da servetsch. Las paginas fan numnadamain reclama ch'ellas vendian las vignettas. Lur pustaziuns registreschan ellas sin la pagina da la Confederaziun.
Scumandada n'è questa pratica betg. Moralmain pon ins però dir ch'ins maina en errur la clientella.
Questa pratica da spedir vinavant las datas saja ina prestaziun da servetsch senza plivalur, di André Bähler da la Fundaziun Svizra per la protecziun da consumentas e consuments. Quai na saja bain betg propi illegal, mabain possian ins moralmain pretender che consumentas e consuments vegnian manads en errur, ha ditg Bähler ad SRF. Latiers vegnia che surtut la clientella da l'exteriur na possia tut tenor betg giuditgar, sch'i sa chattian sin la pagina uffiziala u betg.
Tar terzs poi dar custs supplementars, ed i na dat nagina garanzia ch'ins saja propi registrà sin la pagina uffiziala.
La Confederaziun è cunscienta da las ulteriuras paginas e dals pretschs ch'èn per part pli auts. Ella recumonda da cumprar la vignetta mo sin las pagina uffiziala per evitar eventuals custs supplementars. Dapi l'introducziun da la vignetta electronica avant radund in'emna hajan gia 23'000 persunas cumprà ella. Quantas persunas ch'han pajà in pretsch pli aut, n'è però betg d'eruir.
