La Confederaziun avertescha dad in'unda da chalira che smanatschia ils proxims dis. A partir da la fin d'emna vegnia l'unda marcanta cun temperaturas da fin 35 grads celsius, avertescha l'Uffizi federal per meteorologia e climatologia. En l'entira Svizra saja da quintar cun talas temperaturas sut 800 meters sur mar. L'Uffizi ha per quai proclamà il stgalim da privel trais, quai vul dir ch'i dat privel per umans, tranter auter per la circulaziun.
Baiver bler aua ed evitar strapatschs
Gia oz venderdi èsi da quintar cun temperaturas fin 33 grads, tranter auter a Cuira. Tenor servetschs meteorologics èsi da quintar cun temperaturas maximalas da quest'unda la sonda e la mesemna che vegn. I vegn recumandà da baiver bler aua, evitar strapatschs corporals e tegnair il corp e l'abitaziun pli frestg pussaivel.
