Il minsiter da finanzas Ueli Maurer quinta cun in preventiv federal equilibrà per l'auter onn. L'onn che vegn vegn quintà cun in plus da 0,3 milliardas francs. Quai saja però mo pussaivel perquai che las expensas en connex cun la guerra en l'Ucraina e la tgira da fugitivas e fugitivs vegnia quintà sco expensas extraordinarias. Uschia n'influenzeschan ellas betg il preventiv regular, ha ditg il cusseglier federal Ueli Maurer avant las medias.
Per ils onns suenter quinta il Cussegl federal però cun autras cifras. Ils custs vegnian a crescher ed ins na vegnia betg pli da finanziar las investiziuns. Uschia na possian ins era betg ademplir las pretensiuns dal «frain da daivets». Quai tranter auter tras dapli expensas en connex cun l'armada e la protecziun dal clima. Uschia stoppian ins quintar cun ulteriuras mesiras da spargn. Quai er sche las expensas per corona crodian lura per la pli gronda part.
Quai resulta da las cifras dal preventiv 2023 ch'il Cussegl federal ha preschentà mesemna ensemen cun il plan da finanzas per ils onns 2024 fin 2026.
