Uss decida l'intermediaziun - Budget federal resta tema da dispita
Suenter mintgamai trais rundas da cussegliaziun tar il budget federal per il 2022 resta in punct betg schlià: las chombras n'èn betg dal medem avis sch'i va per il custs e la finanziaziun dal persunal.
Il Cussegl dals chantuns vul reducir ils custs da persunal per 21 milliuns francs en cumparegliaziun cun la proposta dal Cussegl federal. Quella prevesa sur tut ils departaments or custs da radund 6 milliardas francs. Concret vai tar la reducziun che la chombra pitschna pretenda per 120 plazzas. Il Cussegl naziunal na po betg sa stgaudar per questa uschènumnada scursaniziun: quai ha el confermà il mardi cun 103 cunter 83 vuschs.
00:57
video
Ueli Maurer: «In'effect da spargn n'èn quels 21 milliuns strusch».
Or da News-Clip dals 13.12.2021.
laschar ir. Durada: 57 Secundas.
Conferenza d'intermediaziun è dumandada
Suenter ch'omaduas chombras n'èn betg perina sto la conferenza d'intermediaziun sa fatschentar cun l'ultim punct da dispita. Il Cussegl dals chantuns ha dentant in'avantatg – anc sche la conferenza d'intermediaziun decida per la proposta dal Cussegl naziunal – po la chombra pitschna refusar la proposta. Alura giess la proposta cun las pli pitschnas expensas, en quest cas quella dal Cussegl dals chantuns, en vigur.
Budget 2022
Avrir la boxSerrar la box
Il preventiv dal Cussegl federal quinta cun in deficit da radund duas milliardas francs per l'onn che vegn – quai tar expensas da radund 80,725 milliardas francs ed entradas da 78,643 milliardas. Il motiv per il minus è tranter auter la finanziaziun da mesiras economicas ed il sustegn dal provediment da sanadad en consequenza da la pandemia da corona. Il parlament ha en plirs puncts decis da dar ora dapli daners. Il frain a l'indebitament vegn mo cnap respectads.
