En las muntognas cumenzan las plantas ed ils pastgs a crescher oz en media sis dis pli baud ch'avant 25 onns – provocà entras temperaturas pli autas suenter che la naiv è luada. Il motiv principal sajan las temperatura – quellas sajan circa dus grads pli chaudas ch'anc avant passa dus decennis, declera Michael Zehnder ch'ha fatg la perscrutaziun. Cun tut che crescha pli baud exista er il privel d'ina schelira.
Las plantinas ston er esser resistentas per pudair profitar e crescher pli baud ch'usità.
Cun la naiv che svanescha pli baud e las flurs e plantinas che creschian gia baud, possia sa midar zic a zic la cumposiziun da fluras e pastgs. I dettia flurs, plantinas e pastga che sa drizzan tenor la temperatura, autras tenor in'ura interna. Uschia che quellas che van tenor la temperatura creschan pli baud e pudessan stgatschar las autras. Sper las midadas ecologias datti er midadas per la societad. Uschia cumenzan persunas ad ir pli baud en muntogna. Pussaivel saja er ch'ins giaja pli baud ad alp ils proxims onns.
Retschertga da datas cun auta tecnologia e lavur champestra
Ils perscrutaders dal SLF han cumbinà datas da mesiraziun cun las observaziuns al lieu per examinar la reacziun da differents tips da vegetaziun sin la marschauna ch'è pli baud. Concret èn vegnidas analisadas datas da 40 staziuns da mesirar automaticas. Questas datas èn vegnidas cumplettadas cun observaziuns al lieu tar las staziuns da mesirar ch'èn sin autezzas tranter 1'700 e 2'700 meters sur mar.
Accumpagnà collavuratur dal SLF
Il «Minisguard» ha accumpagnà Chasper Buchli dal SLF sin l’areal da perscrutaziun en las muntognas da Tavau.
