La grippa n'è l'emna passada betg sa derasada pli fitg en Svizra, cumpareglià cun l'emna avant. Quintà sin l'entira populaziun hai dà circa 156 consultaziuns per 100'000 abitantas ed abitants, pervi da malesser sumegliant a la grippa. Cumpareglià cun las consultaziuns da l'emna avant è il dumber perfin ì in zic enavos.
Il pli fitg pertutgads sajan il mument ils pli pitschens, fin quatter onns, inditgescha l'Uffizi federal da sanadad BAG en ses rapport emnil. Sch'ins dat in sguard sin las regiuns, mussa sulettamain la regiun Tessin/Grischun ina tendenza ensi, tar las consultaziuns pervi da malesser sumegliant a la grippa.
