Svizras e Svizzers produceschan en media bun 95 kilograms plastic mintg'onn. A questa conclusiun vegn in rapport da l'organisaziun per la protecziun da la mar Oceancare che sa basa sin datas da l'Uffizi federal per l'ambient. Cunquai producescha la Svizra il pli bler plastic per chau, cumpareglià cun ils pajais vischins, la Germania, l'Austria, la Frantscha e l'Italia.
Perquai scriva l'organisaziun da l'ambient Oceancare che la Svizra è il Gion davos dals pajais, tge che pertutga mesiras cunter sfarlattim da plastic. Er la populaziun giavischa tenor in'enquista d'Oceancare mesiras. Perquai haja la politica l'incumbensa da reducir il diever da plastic.
In ulteriur problem saja il consum da plastic. En media dovria mintga persuna en Svizra 127 kilograms plastic mintg'onn. Da quels na vegnian 85% fin 95% però betg reciclads, mabain brischads.
Ina part vegn brischada, in'autra sa tschenta en l'ambient
Tenor Oceancare, che sa basa sin cifras da l'Uffizi federal per l'ambient, vegnan 1'400 tonnas plastic bittadas davent e sa tschentan en l'ambient. Quai ed autras fontaunas da plastic chaschunan ina polluziun da plastic en las auas. Per exempel sa tschentan annualmain 55 tonnas plastic en il Lai da Genevra, uschia sajan gia uss radund 580 tonnas plastic en quel.
