Per l'emprima giada dapi il 2005 saja il deficit puspè pli aut che quai che la conjunctura permettia, scriva il Cussegl federal. El discurra d'in deficit structural da 1,6 milliardas francs. Damai che la vista resta sombra vul il Cussegl federal spargnar en ils proxims onns. Gia per l'onn che vegn vul er spargnar var 1,6 milliardas francs, tranter auter cun in auzar main sco planisà las expensas per l'armada u cun introducir la taglia d'automobils per autos electrics.
Dasper las expensas pli grondas extraordinarias entras la pandemia (3,3 milliardas) e pervi da la guerra en l'Ucraina (0,7 milliardas) è il minus l'onn 2022 er stà bler pli aut che planisà en il quint ordinari. Ina raschun è stada qua ch'i ha dà damain entradas da la taglia anticipada. Il deficit da finanziaziun ha perquai muntà a 4,3 milliardas francs.
Il deficit structural indebitescha l'uschenumnà conto da gulivaziun. Damai che quel ha dentant in stan positiv, na vegn la regla da sancziunar – tenor las reglas dal frain da l'indebitament – betg en funcziun. Tenor quella stuess in deficit lura vegnir cumpensà ils onns proxims cun scursanir las extradas.
