Cun ils daners supplementars vegnian projects militars realisads pli baud, ha communitgà il Cussegl federal. Suenter l'invasiun da la Russia en l'Ucraina avant prest in onn ha il parlament pretendì dapli daners per l'armada. Las expensas per l'armada duain cuntanscher fin il 2030 almain 1% dal product interiur brut (BIP).
Las expensas da l'armada s'augmentan actualmain, dentant pli plaun che previs oriundamain en la planisaziun fin il 2026. Per evitar deficits auts en il preventiv federal durant ils proxims onns aveva il Cussegl federal annunzià il schaner in concept per rectifitgar quel. Ils proxims onns duai dar mintg'onn 300 fin 800 milliuns pli pauc che annunzià.
Ils proxims onns vul il Cussegl federal tranter auter cumplettar l'equipament da las truppas terrestras, meglierar la resilienza da quella e rinforzar la protecziun dal spazi d'aria. Per tals projects ha il Cussegl federal dumandà il parlament per credits da total 1,9 milliardas francs.
24 novs chars armads da grenadiers
Tenor il messadi da l'armada 2023 prevesa il program d'armament 725 milliuns francs, la cumpra da material per l'armada 615 milliuns ed per il program d'immobiglias 555 milliuns. Tar quests projects tutgan 24 novs panzers e muniziun supplementara per truppas terrestras. Dasper quai prevesa l'armada da schlargiar la capacitad da la protecziun da l'aria entras il plaun cun il sistem patriot, la protecziun d'attatgas da cyber duai vegnir meglra ed immobiglias duain vegnir sanadas sco er da installar panels solars en 12 lieus sin ina surfatscha da 17'000 meters quadrats.
Ils ultims onns haja l'armada duvrà ils meds finanzials per meglierar adina puspè l'equipament da l'armada e per serrar largias en il provediment cun l'equipament hai gì num en la communicaziun. I dettia dentant anc adina largias.
Il pli nov program portia incumbensas ad interpresas svizras e quai en la valur da 413 milliuns francs e fatschentas da cumpensaziun da 209 milliuns francs. Uschia portian 86% dals novs credits incumbensas ad interpresas svizras.
