Suenter ch'il Cussegl federal ha communitgà venderdi las novas mesiras per franar il coronavirus, èn intginas curunas en stizuns vegnidas cumpradas vidas la sonda. Quai surtut en las citads pli grondas.
Regals vids fan tema
Venderdi saira cursavan fotografias da butias cun regals vids en differentas medias socialas. Tranter auter regals da legums e conservas en butias grondas a Turitg, Basilea però era da la Svizra dal vest.
Detailists n'han naginas stretgas tar furniziuns
Regals vids possia quai dar, era sche las capacitads dals furniturs sajan augmentadas e dapli persunal, ha respundì la Migros a l'agentura da novitads sda. Collavuraturas e collavuraturs lavurian di e notg per reparter las victualias sin las filialas. Ils detaglists fan dentant cler ch'i na dat naginas stretgas tar la furniziun.
Cumpras grondas na fan betg senn
La presidenta da la Confederaziun Simonetta Sommaruga ha avertì da betg vegnir en panica. La situaziun saja seriusa, dentant stoppian las mesiras vinavant esser supportablas per la populaziun. Da serrar stizuns na saja nagin tema, ha ella declerà.