La Swiss Covid App da la Confederaziun pudess bainbaud survegnir ina ulteriura funcziun. Quella duai avertir sch’ins ha visità in'occurrenza nua ch’er ina persuna infectada è stada. Auter che tar la applicaziun d’enfin uss, avertescha quella app era sch’ins ha tegnì distanza, annunzia la ETH Losanna.
Interrumper chadainas d'infecziun
La nova applicaziun da corona ha num «NotifyMe Check-in», registrescha naginas datas persunalas e na dovria nagin Bluetooth ed er nagin GPS. La finamira da l'app che vegn or dals medems mauns sco la SwissCovid-app saja d’interrumper chadainas d’infecziun. Pertge sch’ina persuna infectada sa chattia en ina stanza cun nauscha ventilaziun, creschia il ristg da s’infectar tras erosols en l’aria.
Per duvrar l'applicaziun creescha l’organisatur da l’occurrenza in QR-Code.
Tgi che visita l’occurrenza po inditgar via quel sia arrivada e partenza. Sch’ina persuna vegn testada pli tard positiv, lura pon tuttas visitadras e visitaders vegnir contactads.