Siglir tar il cuntegn

Header

audio
Quai ans spetga durant la sessiun da primavaira a Berna
Or da Actualitad dals 01.03.2021.
laschar ir. Durada: 05:46 minutas.
cuntegn

Prevista sin sessiun federala Avrir tut subito u cun precauziun

Politicras e politichers da partidas burgaisas vulan far chommas al Cussegl federal e scriver en la lescha che ustarias, kinos e centers da sport dastgan puspè avrir ils 22 da mars. Quai in dals temas durant la sessiun da primavaira a Berna. RTR ha piclà ora insaquants temas.

Ina maioritad da las cumissiuns da sanadad e d'economia dal Cussegl naziunal vul scriver quai en la lescha da Covid-19 ed uschia sfurzar il Cussegl federal da sortir pli spert ord las restricziuns che valan dapi mez schaner.

È quai propi in cumbat da pussanza tranter il Cussegl federal ed il parlament, sco quai ch'ins ha udì e legì ils ultims dis?

Adrian Camartin: Gea, quai èsi. Dentant, quai n’è ussa nagut nov e surprendent. Uschia funcziunescha la politica en Svizra. Sch'il Parlament federal n’è betg cuntent cun la lavur da la regenza lura ha el la pussaivladad dad intervegnir, da modifitgar leschas u era, sco ussa en quest cas concret, da scriver sez chaussas en las leschas.

Quai ch’è en quest cas ussa in pau spezial è ch'ins vul scriver ina data concreta en la lescha da Covid-19. Ils 22 da mars, pia en trais emnas, na duain betg mo las ustarias dastgar avrir, mabain era tut ils indriz en il sectur cultural, divertiment e sport. Pia per exempel era kinos, teaters u era ils centers da fitness.

Il mument nudain nus mintga di da quai da 1'000 infecziuns novas cun il coronavirus en Svizra. Sch'ins avra ils 22 da mars pli u main puspè tut, n’è il risico betg grond ch'il dumber d'infecziuns crescha puspè?

Quai è en tutta cas quai ch'il Cussegl federal ed era la taskforce scientifica teman. La situaziun saja il mument memia fragila, betg il davos pervia da las variantas dal virus ch’èn pli contagiusas ed èn pli e pli derasadas.

Almain en las cumissiuns che han ussa purtà viaden quellas mesiras datti dentant ina stretga maioritad ch’è da l'avis che las cifras sajan ussa bassas avunda per far quels pass. Quai cun respectar ils concepts da protecziun. I saja impurtant da dar a la populaziun ina perspectiva, hai num da la PPS e parts da la PLD e da l'Allianza dal center.

I dat dentant era vuschs, cunzunt da la sanestra, che pretendan ch'i na stettia davos quella offensiva per avrir las ustarias betg exnum il giavisch ch'ustieras ed ustiers pon puspè beneventar lur osps, mabain che la Confederaziun ed ils chantuns na ston betg pli sustegnair finanzialmain la branscha. Perquai che daners datti mo sch'il Cussegl federal scumonda a las ustarias dad avrir. San ellas puspè avrir las portas lura na datti era nagins daners.

Tge schanzas ha quella proposta dad avrir tut ils 22 da mars en il Parlament federal?

Quai n’è betg uschè cler. La PPS è cleramain per avrir, tschellas partidas burgaisas, la PLD e l'Allianza dal center, n’èn betg unidas en quella dumonda. En il Cussegl naziunal pudess la proposta chattar ina maioritad. Impurtant è dentant tge che la chombra pitschna decida. Il Cussegl dals chantuns tracta la lescha da Covid-19 la gievgia. Auter che en il Cussegl naziunal na datti il mument dentant nagina proposta dad avrir tut ils 22 da mars.

Bain pussaivel pia ch'il Cussegl dals chantuns, che sa numna era gugent «la chambre de réflexion», che lez vegn a deescalar il conflict ed a renunziar da scriver ina data concreta en la lescha. Ma, quai vesain nus en il decurs da la segund'emna sch’i va propi en quella direcziun.

Corona procura pia era quella sessiun per debattas animadas. Ma quai n’è betg il sulet che vegn discutà e decidì las proximas trais emnas.

Na. In grond tema ch'è sin la glista dal Cussegl dals chantuns è la revisiun da l'AVS. Suenter che tut ils projects per sanar il sistem dal provediment per la vegliadetgna han fatg naufragi, u en il parlament u pli tard a l'urna, è ussa ina nova proposta sin maisa. Ma, era quella vegn crititgada da tuttas varts. En il coc vai per augmentar la vegliadetgna da pensiun da las dunnas dad oz 64 sin 65 onns, medem sco tar ils umens. La dumonda è qua tge che las dunnas survegnan persuenter.

Ed in auter tema da paisa è l'agricultura, concret co lezza duai sa sviluppar ils proxims onns. Il messadi dal Cussegl federal vul numnadamain che puras e purs han dapli quità da fauna e flora. L'Uniun purila svizra vesa quai dentant critic. Las mesiras che vegnan proponidas fetschian dapli lavur, ils products custian persuenter dapli e la fin finala vegnia era producì pli pauc. Suenter ch'il Cussegl dals chantuns ha schon decidì da sistir l’entir project dependa ussa da la Chombra gronda sch’i va qua vinavant u betg.

E sche nus essan gia tar animals e natira anc in davos punct – il luf. Era lez è puspè tema, e quai gist en omaduas chombras. Suenter il Na a la midada da la lescha da chatscha il settember pretendan duas moziuns ch'il Cussegl federal midia l'ordinaziun uschia ch'ins po sajettar pli spert in luf che stgarpa animals e che periclitescha la populaziun. Il Cussegl federal ha gia annunzià ch'el sustegnia quellas moziuns.

RTR actualitad 12:00

Artitgels legids il pli savens

Scrollar a sanestra Scrollar a dretga