Per ina proxima unda da corona vulan ils chantuns turnar pli spert a la situaziun speziala ch'il Cussegl federal. Quai resulta da la consultaziun d’in palpiri da basa per la fasa transitorica che duai garantir in agir svelt en cas sche la situaziun enturn il coronavirus sa pegiurescha.
Dapi l'avrigl sa chatta la Svizra puspè en la situaziun normala, suenter prest dus onns situaziun speziala pervi dal coronavirus. Il Cussegl federal vul pir turnar en ina situaziun speziala sch'i avess da dar ina nov unda gronda e ferma – ils chantuns percunter vulan turnar pli svelt en la situaziun speziala sche la situaziun vegn mendra. Quai per evitar differentas reglas da chantun a chantun, scriva la Conferenza svizra da las directuras e dals directurs chantunals da sanadad GDK. Cun la situaziun speziala va la responsabladad a la Confederaziun – tar la situaziun normala resta quella tar ils chantuns.
