Siglir tar il cuntegn

Header

cuntegn

Coronavirus Confederaziun recumonda da vaccinar uffants

La Confederaziun è s'exprimida uffizialmain per la vaccinaziun cunter Covid-19 tar uffants. La Cumissiun federala per vaccinaziuns e l'Uffizi federal da sanadad han adattà il mardi lur recumandaziun. Er uffants tranter 5 ed 11 onns possian sa laschar vaccinar

Il vaccin da Pfizer/Biontech per ils uffants ha survegnì il venderdi glisch verda da l'institut per medicaments Swissmedic. Las dosas dal vaccin per uffants duain arrivar durant las proximas trais fin quatter emnas en Svizra – a partir da l'entschatta schaner duain quellas star a disposiziun. En Svizra datti radund 600'000 uffants tranter 5 e 12 onns.

Chantuns pon decider

Ils chantuns pon decider e communitgar sez cura e nua ch'ils geniturs pon annunziar lur uffants per la vaccinaziun. Quella vegn ad esser, tuttina a la vaccinaziun per creschids, gratuita.

La recumondaziun vala cunzunt per uffants, ch'han da sbatter cun ina malsogna cronica. Prioritad han er uffants ch'han contact cun persunas fitg vulnerablas, per exempel a chasa.

In terz da la dosa

La vaccinaziun per uffants cuntegn in terz da la dosa da quella per giuvenils e creschids. Els duain survegnir en total duas dosas durant trais emnas. Tenor il studi d'admissiun da Swissmedic protegia la vaccinaziun «bunamain cumplainamain» dad ina greva malsogna pervia da Covid-19.

video
Christoph Berger «La vaccinaziun è segira»
Or da News-Clip dals 14.12.2021.
laschar ir

Effects secundars dettia pli paucs che tar giuvenils e creschids. I possia dar cas da stancladad, mal il chau, fevra e mal las giugadiras. Ils sintoms cuzzian per regla mo curt.

RTR novitads 14:00

Artitgels legids il pli savens

Scrollar a sanestra Scrollar a dretga