Pli baud eran ins da l'opiniun che la mafia dovria la Svizra sulet sco refugi. Uss san ins dentant che quai n'è betg uschia. La mafia è er activa en Svizra, lava daners, investescha quels ed è participada vi dal traffic cun drogas ed armas.
Sco Nicoletta della Valle, la directura da la fedpol ha ditg envers SRF, sajan ils mafiosi dad oz, ils biadis dals immigrants d'avant 50 onns – pia gia la terza generaziun da la mafia en Svizra. Els èn bain integrads e na crodan betg si en il mintgadi. La fedpol sensibiliseschia perquai auters uffizis da far stim ed infurmar els sch'insatgi che survegn agid social cumpria per exempel in'immobiglia u ina fatschenta. Quai sajan las infurmaziuns ch'els dovrian.
Arrestaziuns er en Grischun
Il november passà avevi dà arrestaziuns en connex cun la mafia er en Grischun. Total eran vegnidas arrestadas sis persunas sin dumonda da las autoritads talianas. Duas da quellas sis persunas èn vegnidas arrestadas en Grischun.
