La rimnada da suttascripziun dals iniziants ha dapli che 100'000 suttascripziuns ed è cun quai permessa per ina votaziun. Quai communitgescha la Chanzlia federala. L'iniziativa «stop F-35» pretenda da fixar en la Constituziun federala che la Confederaziun na dastga betg cumprar aviuns da cumbat dal tip F-35.
I n'è anc betg cler tge rolla che questa iniziativa gioga per la cumpra da novs aviuns da cumbat. Ils contracts da cumpra per il F-35 èn gia scrits e la Confederaziun ha temp fin il mars 2023 da suttascriver il qual. Sche ins po votar avant che la Confederaziun ha da suttascriver il contract da cumpra n'è betg cler.
La Gruppa per ina Svizra senza armada GsoA, la Partida socialdemocratica e la Partida verda han rimnà las suttascripziuns in mez onn avant che il termin per rimnar scada.
Betg spetgar sin la votaziun
Il Cussegl dals chantuns e la cumissiun dal Cussegl naziunal vulan suttascriver ils contracts uschè spert che las chombras han dà glisch verda. Er il Cussegl federal vul suttascriver fin il pli tard la fin da mars 2023.
Ils iniziants percunter pretendan sco emprim ina votaziun davart l'iniziativa. Per che quella po avair lieu stuessan las duas chombras dentant tractar e decider davart l’iniziativa anc en la sessiun d'atun. Il Cussegl federal sto annunziar ils projects da votaziun per ils 12 da mars almain quatter mais avant la dumengia da votaziun, pia il pli tard mez november. Quai po il Cussegl federal dentant pir far suenter ch'il Parlament federal ha tractà a fin l'iniziativa.
Nagina votaziun in mars 2023
Ils 24 d'avust ha il Cussegl federal decis ch'ina votaziun avant il mars 2023 n'è betg pussaivla. Il Cussegl federal vegnia a deliberar la missiva per l’iniziativa dal pievel avant la sessiun d'enviern 2022. Quai na tanschia betg per ina votaziun a l'urna avant la fin da l'offerta. I na saja er betg pussaivel sche las proceduras usitadas en l'administraziun federala vegnian pli sveltas. L’obligaziun da diligenza na fiss betg garantida. Quai rendess impussibel da tractar a moda seriusa l’iniziativa per il parlament ed il Cussegl federal.
