Tar ils tests da Covid-19 ch'ins po far sez, hai eventualmain dà cunvegnas da pretschs. Perquai ha la cumissiun da concurrenza WEKO avert ina procedura cunter trais distributurs.
Ils trais distributurs duain avair mess sut squitsch in concurrent – da vender ses products per il medem pretsch sco sia concurrenza. Ils distributurs vulevan para cuntanscher, ch’il concurrent auzia ils pretschs da las marcas Joinstar, Hotgen e Lysun.
Els quintian d’avair sin maisa ils resultats da l’emprima procedura en trais fin nov mais, ha la WEKO ditg sin dumonda a l’agentura da novitads Keystone-SDA. Las investigaziuns actualas na sa drizzian betg cunter l’interpresa Aristos International GmbH, che haja annunzià il cas.
Davent dals 7 d'avrigl
A partir da mesemna proxima duain ils autotests star a disposiziun gratuit a la populaziun svizra, è il plan dal Cussegl federal. Mintga persuna dastga retrair tschintg da quests tests al mais. En in’emprima fasa sajan ils autotests da survegnir sulettamain en apotecas, ha l’Uffizi federal da sanadad BAG laschà savair la fin d’emna passada.
