Suenter las renfatschas da l’uschenumnada «cumissiun da Helsinki» ha l’ambassadur svizzer en il Stadis Unids, Jacques Pitteloud, pretendì pled e fatg dals politichers americans. Quai ha confermà il Departament federal d’affars exteriurs envers la «NZZ am Sonntag». La Svizra haja refusà tut las renfatschas da la cumissiun da Helsinki – in’autoritad independenta da la regenza dals Stadis Unids che s’occupescha cun la segirezza e collavuraziun en l’Europa.
En pli haja ella condemnà l’appel d’intgins commembers da sancziunar anteriurs emploiads da la Confederaziun. L’anteriur procuratur public general Michael Lauber e dus ulteriurs Svizzers hajan gidà a persunas sancziunadas da la Russia da survegnir access a daners bloccads en Svizra, uschia la renfatscha da la cumissiun.
04-08-2023
Confederaziun intervegn en l'USA
Il Departament federal da l'exteriur ha intervegnì tar las autoritads americanas encunter la reproschas da la uschenumnada «cumissiun da Helsinki». Questa cumissiun, ch'è in gremi da la regenza americana, aveva mess en dubi che la giustia svizra funcziuneschia ed ha discurrì da corrupziun. Plinavant ha la cumissiun pretendì sancziuns encunter l'anteriur procuratur public general Lauber e dus anteriurs collavuraturs da la Confederaziun. L'EDA n'è betg d'accord cun las pretensiuns da la «cumissiun da Helsinki».
31-07-2023
Michael Lauber crititgescha la Confederaziun
L'anteriur procuratur public general Michael Lauber renfatscha a la Confederaziun da realisar memia plaun sancziuns cunter la Russia. La Svizra saja memia passiva en chaussa, ha ditg Lauber envers las gasettas da Tamedia.
Lauber sez è actualmain confruntà cun renfatschas da la Cumissiun da Helsinki, in’autoritad independenta da la regenza dals Stadis Unids che s’occupescha cun la segirezza e collavuraziun en l'Europa. Quella renfatscha a Lauber e dus ulteriurs Svizzers d’avair gidà a persunas sancziunadas da la Russia da survegnir access a daners bloccads en Svizra. Concret vai per 18 milliuns francs che la Confederaziun aveva bloccà l’entschatta dals onns 2010 pervia dal suspect da fraud fiscal. Lauber refusescha tut las renfatschas. I vala la presumziun d'innocenza.
Dal 2012 fin il 2020 è Michael Lauber stà procuratur public general. Lura era el sa retratgs pervia da l'affera enturn inscunters betg protocollads cun il president da la Fifa, Gianni Infantino.