Tranter ils 3 da fanadur ed ils 17 d'avust ha in luf stgarpà sin pliras alps uranaisas 13 nursas. La surveglianza da chatscha u chatschadurs spezialmain numnads han uss l'incumbensa da sajettar il luf ils proxims 60 dis. Suenter n'è la chatscha sin quest luf betg pli permessa, sco la lescha federala prevesa.
In auter luf ha pudì mitschar
En il chantun Uri è il luf ch'era vegnì dà liber la fin da matg per sajettar mitschà. Schebain el sa chatta anc en il territori dal chantun Uri n'è betg cler. Suenter che l'animal aveva stgarpà 5 chauras e 13 nursas en la vischnanca da Wassen aveva la direcziun dal chantun dà la lubientscha da sajettar el.
Quella valeva però be per il territori nua ch'il luf aveva fatg ils donns ed era limitada sin 60 dis. Quest temp è ussa passà senza che la surveglianza da chatscha ha pudì tiers l'animal.
Tenor lescha federala dastgan ils chantuns sajettar en atgna reschia lufs sch’els «chaschunan in donn considerabel». In tal donn exista sch’almain 10 animals èn vegnids stgarpads entaifer quatter mais en in territori e quai malgrà mesiras da protecziun là nua ch'igl è pussaivel.
Er en auters chantuns è il luf in tema, respectivamain las dumondas da sajettar:
Ina survista da la situaziun en il Grischun porscha RTR qua:
