Guardiaselvaschinas dal chantun Glaruna han la notg sin dumengia sajettà ina luf femella. Gartegià saja quai cura che la femella saja turnada en il Krauchtal tar in animal da niz stgarpà, communitgescha il chantun Glaruna.
La femella aveva tranter auter stgarpà en ses territori 13 nursas e duas chauras da differentas muntaneras. Ils animals da niz stgarpads èn vegnids tegnids sut mesiras da protecziun u en territoris nua che la protecziun da muntaneras na po betg vegnir ademplida.
La lubientscha da sajettar l'animal singul aveva la regenza glarunaisa dà la fin da fanadur. Quella è stada valaivla a partir dal prim d'avust per 60 dis, respectivamain uschè ditg ch'ils animals èn alpegiads. Il triep da lufs glarunais Kärpf n’è betg stà pertutgà da la decisiun.
Er il Vad lascha sajettar in luf
La regenza dal Vad ha ordinà da sajettar in luf en las Alps Vadaisas. Quel aveva attatgà en la regiun dal lai Lioson duas vatgas giuvnas ch’èn suenter crappadas. Ins suppona ch’il luf haja era stgarpà set chauras en la regiun Ormonts. Il chantun ha era dumandà la Confederaziun da pudair regular il rudel da Marchairuz en il Jura vadais.
La situaziun en il Grischun
Era en il Grischun resta il luf in tema actual. Ina survista chattais qua:
