Represchentants da la Confederaziun han infurmà en connex cun la pandemia da corona. Il pli impurtant, curt e concis:
- Pèrs betg maridads da quels in dals partenaris abita en Germania u Austria pon puspè passar sur il cunfin. Il medem vala per famiglias e possessurs da segundas abitaziuns.
- Il dumber da novs cas da corona va anc adina enavos.
- Fin oz han 123'000 interpresas survegnì daners dals credits da Covid-19. Per prevegnir a maldiever è vegnì sviluppà in concept.
Relaziuns sur cunfin
Pèrs betg maridads da quels in dals partenaris abita en Germania u Austria pon puspè passar sur il cunfin. Quai ha ditg Mario Gattiker, il secretari da stadi per migraziun, il venderdi davant las medias. Da nov dastgan er persunas puspè viagiar da l'Austria e Germania en Svizra per visitar parentella e da la Svizra en quels dus pajais. Er averts vegnan ils cunfins per persunas da quels dus pajais che han in segund domicil en Svizra e viceversa. Questas reglas van en vigur a partir da mesanotg da venderdi sin sonda.
Spezialas prescripziuns da quarantina datti dentant anc en il Bundesland Baden-Württemberg. Per burgais da l'UE e EFTA vegnian quellas dentant abolidas. Quai possia dentant anc cuzzar in pèr dis, ha declerà Gattiker.
Il mument anc scumanads èn viadis per far cumpras, tancar ubain per scopo turistic sur cunfin.
Frantscha ed Italia pli tard
Actualmain na vala quella schluccaziun dentant anc betg per la Frantscha. La finamira saja dentant er qua dad avrir ils cunfins sin ils 15 da zercladur. Ins saja anc vi da discussiunar, uschia Gattiker. En l'Italia saja la situaziun anc in'autra. Ins vegnia a tschertgar cun il pajais il discurs, uschè svelt che la situaziun pandemica lubeschia quai.
Cas d'infecziun van enavos
Il dumber da novs cas da corona va anc adina enavos. Quai er sch'igl ha dà las ultimas 24 uras cun 51 cas in cas dapli ch'il di avant, ha resumà Daniel Koch delegà dal BAG la situaziun actuala. Ch'ils cas giajan enavos saja impurtant, perquai ch'ins veglia uss puspè suandar quels per interrumper chadainas d'infecziuns.
Plinavant ha Koch er declerà, pertge ch'i fetschia senn da laschar enavos il num e numer da telefon en ustarias. Quai na saja nagina controlla. I giaja per pudair infurmar, sche giasts sajan vegnids en contact cun ina persuna infectada. Quai saja surtut impurtant, sch'in impiegà d'in restaurant saja s'infectà ed haja gì contact direct cun giasts.
Anc paucas mascras en traffic public
Vincent Ducrot, il nov directur da las Viafiers federalas, ha declerà ch'il concept da protecziun dal traffic public saja vegnì realisà. Las viafiers nettegian fitg savens ils trens ed ils meds da traffic public surtut en las aglomeraziuns vegnian puspè frequentads dapli.
Las reglas da tegnair distanza sajan dentant er da resguardar en il traffic public e sche quai na saja betg pussaivel, duessan ils viagiaturs purtar ina mascra. Ins vegnia anc a far latiers ina campagna da sensibilisaziun e tut tenor er reparter mascras. D'introducir in obligatori na saja dentant betg pussaivel.
Auter è quai tar trens che surpassan il cunfin. En quels trens valan las reglas dal pajais, nua ch'il tren sa chatta. Sch'il traffic public surpassa sco previs a partir dals 25 da matg puspè ils cunfins, lura vala in obligatori da mascras uschè svelt ch'il tren è per exempel en Germania u Austria.
Prevegnir a maldiever da credits
Fin oz han 123'000 interpresas survegnì daners dals credits da Covid-19. En 36 cas dettia in suspect da maldiever, ha ditg Erik Jakob dal Seco davant las medias. Tar 9 ulteriurs cas na saja il suspect betg sa verifitgà. Ins haja uss sviluppà in concept d'examinar ils cas per prevegnir a maldiever.
En total saja il dumber da cas da maldiever pitschen. 123 bancas sa participeschan vid il program da credit. Las 123'000 interpresas han survegnì agid finanzial da radund 14,6 milliardas francs. Per ils credits tranter in mez milliun e 20 milliuns dettia sulet intginas 100 dumondas.
