La midada da sistem duai dad ina vart motivar dapli persunas da lavurar, da l'autra vart abolir l'uschenumnada «puniziun da maridaglia». La taglia individuala duess vegnir introducida sin tut ils trais nivels statals: vischnanca, chantun e Confederaziun.
Concret vul quai dir: Mintga persuna emplenescha ora sia atgna decleraziun, era persunas maridadas. Tar persunas maridadas vegnan actualmain dumbradas ensemen las entradas e tenor quai quintà la taglia. Tscherts pèrs pajan uschia dapli che tenor taglia individuala – questa differenza vegn era numnada la puniziun da la maridaglia.
Adattaziun da la tariffa da taglia
Sin il nivel statal duain ins plinavant pudair trair giu 12'000 francs empè da var 6'600 per uffant. Cun la midada duai era dar adattaziuns tar la tariffa da taglia. Quella vegn adattada uschia che persunas cun entradas bassas fin mesaunas pajan pli pauca taglia. Persunas cun entradas fitg autas pajan dentant minim dapli. La progressiun s'augmenta pia in pau.
Pli paucas entradas
Il Cussegl federal quinta cun entradas pli bassas da var ina milliarda francs per onn. La gronda part da quellas entradas che crodan davent, circa 800 milliuns, duai surpigliar la Confederaziun, il rest ils chantuns. Cun quai che tut ils chantuns duessan era midar il sistem d'imposiziun, quinta la Confederaziun che quellas entradas pli bassas sa mussian pir en intgins onns.
Co vai vinavant?
Fin il mars 2024 vegn il Cussegl federal a lavurar vi da la missiva per ina lescha federala che duai esser la cuntraproposta indirecta a l'iniziativa che pretenda l'imposiziun da taglia individuala en Svizra. Silsuenter debattescha il Parlament federal davart la proposta.
