«Il Cussegl federal ha adina accentuà, ch'ils trais puncts averts ston vegnir sclerids.» Il mument dettia anc differenzas fundamentalas, schebain che la Svizra haja fatg cumpromiss impurtants en ils discurs, ha Guy Parmelin declerà vinavant. Sut il stritg dovria quai ina schliaziun equilibrada.
Cumissiuns vulan cuntinuar tractativas
Las cumissiuns per la politica exteriura da omaduas chombras vulan cuntinuar cun las cun las tractativas. Da rumper giu las tractativas cun la UE na saja nagina opziun.
Consultaziun dals chantuns
Uss vul la regenza consultar ils chantuns. Silsuenter vegnia il Cussegl federal a far in giudicament cumplessiv, ha declerà il minister da l'exteriur Ignazio Cassis. Er lez ha discurrì avant las medias en Chasa federala.
Gia suenter l'inscunter tranter il president da la Confederaziun Guy Parmelin ed la presidenta da la cumissiun da l'UE Ursula von der Leyen aveva el ditg avant las medias ch'i dettia divergenzas considerablas. Omaduas varts stoppia evaluar l'inscunter. Per la Svizra munta quai er da consultar las cumissiuns ed ils chantuns.