Sulettamain 8 dals 25 commembers da la cumissiun han pretendì ch'ils discurs vegnan immediat terminads. La gronda part saja dentant da l’avis ch’in resultat cuntentaivel saja pussaivel, ha ditg la presidenta da la cumissiun Tiana Angelina Moser (PLV) avant las medias. Quai suenter che la cumissiun è s'inscuntrada cun il president da la Confederaziun Guy Parmelin ed il minister da l'exteriur Ignazio Cassis.
Il Cussegl federal duaja intensivar ils discurs cun l'Uniun europeica e preschentar bainbaud propostas per ils puncts averts. Parmelin e Cassis vulan anc en il decurs dal di prender posiziun en chaussa.
Nagin progress tar ils discurs cun l'UE
Il president da la Confederaziun Guy Parmelin aveva inscuntrà la presidenta da la cumissiun da l’UE Ursula von der Leyen il venderdi a Brüssel. Els hajan constatà ch’i dettia anc divergenzas considerablas davart la cunvegna da basa, aveva Parmelin ditg suenter l’inscunter.
Tuttina sajan ils discurs da valitar positiv. Igl era l'emprim discurs dapi in lung temp tranter las duas partidas. Grazia a la represa dals discurs dastgian ins sperar che las duas partidas possian chattar ina soluziun per la cunvegna da basa.
Plan B è en lavur
Co Parmelin ha gia communitgà il venderdi duain las negoziadras - Livia Leu per la Svizra e Stépahnie Riso per l'Uniun Europeica - star vinavant en contact. En il medem mument ha Parmelin dentant er accentuà ch'il Cussegl federal na vegnia betg a suttascriver la cunvegna da basa senza avair chattà ina soluziun per ils trais puncts dispitaivels - vul dir: la protecziun da las pajas, la directiva davart ils dretgs dals burgais da circular libramain en l'UE, ed ils subsidis dal stadi.
Il Cussegl federal patratga adina en alternativas.
Tar tut ils puncts da discussiun haja la Svizra fatg propostas concretas. Tuttina n'hajan ins betg fatg il progress giavischà, uschia Parmelin. Sin la dumonda dal "SonntagsBlick" sch'il Cussegl federal lavuria gia actualmain vid alternativas - ha Parmelin ditg ch'il Cussegl federal patratgia adina en alternativas. Questa discussiun saja dentant prematura.